EOS-lávdegoddi

Stuoradikki dárkkistanlávdegoddi čiegusbolesbarggu, bajilgeahččama ja sihkarvuođabálvalusa várás

Mii lea EOS-lávdegoddi?

EOS-lávdegoddi lea dárkkistanorgána man Stuoradiggi lea nammadan. Lávdegoddi bargá almmá čanastagaid haga Stuoradiggái, muhto raportere juohke jagi Stuoradiggái jahkedieđáhusas. EOS-lávdegottis leat 7 mieldelahtu ja dálá jođiheaddji lea Helga Hernes. Eará mieldelahtut leat: Svein Grønnern (nubbinjođiheaddji), Kjersti Graver, Trygve Harvold, Gunhild Øyangen, Knut Hanselmann ja Theo Koritzinsky.

Lávdegoddi galgá jotkolaččat dárkkistit dáid ásahusaid: Politiets sikkerhetstjeneste (PST), Nasjonal sikkerhetsmyndighet (NSM), Etterretningstjenesten (E-tjenesten) ja Forsvarets sikkerhetsavdeling (FSA), nudaddjon "EOS-bálvalusaid". Maiddái čiegusbolesbargo-, bajilgeahččan- ja sihkarvuohtabálvalus, man barget dahje stivrejit eará almmolaš eiseváldit, gullet lávdegoddái dárkkistit jus ulbmil lea áittardit naššuvnnalaš sihkarvuohtaberoštumiid ("riikka sihkarvuođa").

Dárkkisteami ulbmil ja čađaheapmi

EOS-lávdegotti dárkkisteami ulbmil lea vuosttažettiin gozihit vai ovttaskas olbmuid riektesihkarvuohta ja persovdnasuodji fuolahuvvo EOS-bálvalusaid bokte, muhto lávdegoddi galgá maiddái oppalaččat dárkkistit ahte EOS-bálvalusat barget siskkobealde mearriduvvon rámmaid mat leat lágain ja eará njuolggadusain. Lávdegoddi galgá fuolahit vai ii ovttage vuostá meannuduvvo vuoigatmeahttumit ja geahččat bearrái ahte bálvalusat eai váldde atnui viidátguoski gaskaomiid go dat mii lea dárbbašlaš dilálašvuođaid vuođul. Lávdegottis lea dievaslaš vejolašvuohta beassat geahčadit bálvalusaid arkiivvaid ja registariid, ja leat unnán gáržžádusat dasa movt lávdegoddi sáhttá dárkkisteami čađahit.

Lávdegoddi ii leat čadnon guđege láhkái EOS-bálvalusaide iige hálddahussii oppalaččat. Lávdegoddi bajilgeahččá bálvalusaid dássedit, sihke guovddáš ja báikkálaš bálvalusbáikkiin. Lávdegoddi meannuda maiddái váidagiid maid ovttaskas olbmot ovddidit, ja jođiha iskkademiid iežas doaimmain.

Eambbo das movt lávdegoddi meannuda ovttaskas olbmuid váidagiid

Olbmot geat oaivvildit EOS-bálvalusat leat vuoigatmeahttumit meannudan sin vuostá, sáhttet váidit ášši EOS-lávdegoddái. Lávdegoddi meannuda buot váidagiid mat gullet lávdegotti dárkkistanbarggu viidodahkii.
Váidda galgá leat čálalaš ja vuolláičállojuvvon. Váidaga galgá ákkastallat ja čilget nu dárkilit go vejolaš. Váidaga galgá sáddet dábálaš poasttain. Persovdnasuoji dihte ja vai lávdegoddi galgá leat áibbas vissis váidaleaddji identitehtas, de eat dohkket váidagiid e-poastta bokte, muhto dieđusge sáhttá jearaldagaid sáddet lávdegoddái e-poasttas deike:
post@eos-utvalget.no dahje riŋget 23 31 09 30.
Sáhttá maiddái váldit oktavuođa lávdegotti čállingottiin vai oažžu veahki váidaga bidjat ja/dahje lasihit dieđuid váidagii njálmmálaččat čállingotti kanturlanjas. Váidagiin mat galget EOS-lávdegoddái, eai leat áigemearit biddjon. Lávdegoddi lea almmatge várrogas meannudit váidagiid mat gusket áigahaš dilálašvuođaide, eara jus áššis orro leamen áigeguovdilis mearkkašupmi váidaleaddjái, dahje sus lea leamaš váttis árat ovddidit váidaga.

Go váidda boahtá, de čállingoddi golmma vahku áiggis addá gaskaboddosaš vástádusa váidaleaddjái ja bidjá váidaga ovdan lávdegoddái, mii mearrida galgá go váidda váldojuvvot meannudeapmái. Váidaleaddji oažžu dieđu lávdegotti mearrádusas. Váidagat, mat váldojit meannudeapmái, guorahallojuvvojit daid bálvalusaid ektui maidda váidda guoská. Dát dáhpáhuvvá muhtin muddui čálalaččat, muhtin muddui njálmmálaččat inspekšuvnna bokte, ja muhtin muddui arkiivvaid ja registariid suokkardemiin. Lávdegoddi meannuda váidagiid
čihkosis, muhto go váidda váldojuvvo guorahallamii, de dat bálvalus masa guoská, oažžu diehtit dan. Lávdegoddi ii sáhte bálvalusaide addit gohččumiid ahte sii galget dahkat juoidá muhtin áššiin, muhto lávdegoddi buktá oainnu ovdan, ja sáhttá ávžžuhusa addit bálvalussii, ovdamearkka dihte bivdit meannudit ášši ođđasis. Jus váiddaášši guorahallamat čájehit moaitinveara dili, de loahpahuvvo ášši čálalaš cealkámušain dan bálvalussii masa guoská. Dakkár dilálašvuođain sáhttá lávdegoddi maiddái bivdit guoskevaš bálvalusa njulget boasttuvuođaid ja addit buhtadusa jus lea vahát dáhpáhuvvan dahje gártan unohasvuohta váidaleaddjái.

Cealkámušat váidaleddjiide galget leat nu dievaslaččat go vejolaš, muhto ii galgga addit dakkár čuvgehusat mat sihkarvuođa dihte leat gráderejuvvon. Lea dehálaš muitalit ahte lávdegotti njuolggadusat, dalle go váidda guoská PST vuostá, leat nu ahte dábálaččat sáhttá lávdegoddi duššefal cealkámuša addit das ahte leago váidagis vuođđu moaitit bálvalusa vai ii. Čuvgehus dan birra leago oktage gozihuvvon vai ii, leat čuvgehusat mat sihkarvuođa dihte leat gráderejuvvon čuvgehusat. Dan dihte ii sáhte lávdegoddi muitalit váidaleaddjái leago son leamaš - vai ii leat leamaš - registrerejuvvon dahje gozihuvvon. Muhto áššiin main moaitinveara dilit fuomášuvvojit, dáhttu lávdegoddi ávžžuhit guoskevaš bálvalusa rahpat gráderejuvvon dieđuid vai lea vejolaš dievasmahttojuvvon ákkastallama addit.

Ná válddát oktavuođa

Postadresse: Stortinget, 0026 Oslo
Fitnančujuhus: Akersgata 8, 4. etáša (sisa manatTollbugata)
E-poastačujuhus: post@eos-utvalget.no
Telefovdna: 23 31 09 30
Telefáksa: 23 31 09 40